Yon gwoup palmantè ameriken, pami yo Frederica S. Wilson, James P. Mcgovern, David N. Cicilline, Barbara Lee, Joaquin Castro, Eleanor Holmes Norton ak Ted Deutch, atire atansyon sekretè deta ameriken an Mike Pompeo sou konsekans òganizasyon eleksyon ayisyèn yo ap genyen sou lavi pèp ayisyen an.
Si pou Mike Pompeo, prezidan Repiblik la, Jovenel Moïse, dwe òganize eleksyon lejislativ yo byen rapid, gwoup palmantè sa a mande diplomat la pou l itilize vwa Etazini pito nan peyi Dayiti pou eleksyon lib ak demokratik ki respekte manman lwa peyi a, Konstitisyon an.
« Si se yon obligasyon pou n sipòte Ayiti pou l retounen sou chimen demokrasi a, politik amerikèn nan pa dwe favorize eleksyon presipite ki kapab destabilize sistèm politik ayisyen an », se sa gwoup palmantè a ekri nan yon korespondans yo voye bay diplomat.
« Etazini dwe pran prekosyon pou l pa lejitimite konpòtman antidemokratik », se sa yo mande Mike Pompeo.
Daprè gwoup palmantè sa a ki baze sou preyokipasyon sosyete sivil ayisyèn nan, Konsèy elektoral pwovizwa a (KEP) ki antikonstitisyonèl ak ilejitim prezidan Jovenel Moïse mete sou pye ak absans dyalòg enklizif li refize ap fè demokrasi a plis mal nan peyi Dayiti.
Wilner Jean
