Depi kèk jou Federasyon entènasyonal foutbòl asosyasyon (FIFA) pran desizyon pou radye ansyen prezidan Federasyon ayisyèn foutbòl (FHF) la nan tout aktivite ki gen pou wè ak foutbòl paske komite etik FIFA a jije Dr Yves Jean-Bart koupab nan abize ti medam yo sèksyèlman, epi ale pi lwen pou l di te gen abi otorite.
Nan sans sa, enstans siprèm nan tranche pou radye yon figi ki make espò ayisyen an paske Dadou bay 20 tan nan vi l ak koze espò nan peyi isit nan tout kategori.
Menm jou komite etik FIFA a pran desizyon an, te gentan gen yon nòt k’ap sikile ki fè kwè Dadou Jean-Bart pral fè apèl devan “TAS”, ki se tribinal abitral espò ki abitye kase gwo desizyon ki pran deja, si moun yo akize a pa antò.
Depi jou ki te lendi 23 novanm nan, youn nan avoka Yves Jean-Bart yo, Mèt Stanley Gaston, ansyen batonye lòd avoka yo pandan 2 fwa, vle fè kwè, ansyen prezidan an pa gason, sa vle di nan langaj ayisyen, pa leve kanpe. Yon fason pou montre komite Etik FIFA a ap sal repitasyon Dadou.
Depi kilè Dadou pa gason? Èske si l pa ta ka leve kanpe vre sa fè l pa ka abize yon fi seksyèlman? Èske vyòl sou fi se sèlman lè vyolè a penetre fi a ak gigit pa l? Se yon ansanm kesyon nou rive poze akoz teknoloji a ki tèlman avanse, mesye yo gen plizyè metòd yo itilize pou fè tèt yo plezi lè ti pati yo paka kanpe ankò.
Jeff Jean Joseph