Depi kèk jou dola a rekòmanse pran valè sou goud la. Nan sans sa, ekip Haïti News lan te rann li nan yon mache nan kapital la pou gade kijan pri pwodwi yo ye paske gen anpil plenyen nan mitan popilasyon an.
Nan ankèt sila a, repòte Haïti News yo te kesyone anpil machann ki te pwofite moman sa pou kritike leta ki pa fè anyen fas a sitiyasyon malouk sa.
Nan mache sa a, Haïti News konstate kès somon an sòti nan 1000 goud li pase a 1250 goud. Sak farin, mayi, ble ki te vann 1250 goud pase a 1650 goud. Sak diri a ki te 1200 goud monte nan 1650 goud.
Toujou daprè ankèt sa, kès lèt dlo a sòti nan 1000 goud li grenpe nan 1650 goud. Yon sitiyasyon machann yo deplore paske, daprè yo menm, sa fè yo pa ka vann jan sa te ye avan.
Machann yo, ki pa t mete dlo nan bouch yo, kritike leta ki pa fè anyen fas a sitiyasyon ensekirite alimantè sa a k ap vin malouk chak jou pi plis.
Jeff Jean Joseph
