Kandida demokrat pou Mezon Blanch lan, Joe Biden kontinye ap pran teren nan kontaj vòt yo. Vandredi li pase devan Donald Trump nan Eta kle Jewòji, kote depouyman vòt yo ap kontinye, daprè plizyè medya pami yo CNN ak Fox News.
Joe Biden, ki ratrape premye reta inisyal li, pase devan Donald Trump pou kounya ak 917 vwa nan Eta sila.
Rezilta yo sere, okenn gwo medya poko atribiye viktwa bay okenn nan 2 kandida yo nan Jewòji ki genyen 16 gran elektè.
N ap raple, pou Donald Trump, 74 lane oubyen Joe Biden, 78 lane, pran kontwòl pouvwa nan peyi Lèzetazini, yo bezwen 270 gran elektè vote pou yo — kidonk majorite kolèj elektoral la — k ap ouvè pòt Mezon Blanch lan bay youn nan yo. Daprè CNN ak Fox News, Joe Biden toujou rete 264 vwa, epi 215 pou Donald Trump.
Lèzetazini, ki ap tann non sila k ap prete sèman 20 janvye 2020 pwochen an, ap gade pou kounye a Eta kle Pennsilvani, ki konte 20 elektè poukont li, epi kapab mete yon bout nan sispens yo.
Si ansyen vis prezidan Barack Obama ranpòte l nan Eta sila, ki endistriyèl, l ap vin 46è prezidan Lèzetazini.
Pooshy Rosana
