Nou Pap dòmi anonse sosyete a an jeneral nan kad batay kont koripsyon ak enpinite andedan peyi a, pou lajistis sosyal, li deside lanse yon kanpay k ap kòmanse nan dat 20 oktòb pou denonse enpinite ak banalizasyon lavi nan peyi Dayiti.
Kanpay sila a fèt nan kad batay pou lavi, ki se batay pou kwape tout rejim bout di ak dirijan chaloska k ap trete ayisyen kou zannimo y ap mennen labatwa. Mòd pratik kolon sa yo ak kòmandè sa yo remonte depi nan tan lesklavaj.
Nan sans sa òganizasyon an rale yon bann chif pou montre valè moun ki mouri ki kidnape sou rejim PHTK a.
Sòti mwa janvye pou rive mwa dawout 2020, 944 moun mouri asasinen. 124 ka kidnapin konfime sòti premye janvye rive 31 dawout 2020. 287 moun maspinen, 42 mouri egzekite ak bal nan tèt nan manifestasyon kont PHTK, sòti 2018 pou rive 2019. 214 ti moun òfelen akoz masak ki fèt nan katye popilè yo. Nan 2 dènye lane yo 9 masak fèt sa ki koz 306 moun mouri, 56 lèzòt disparèt.
Sòti mwa dawout pou rive 20 oktòb 2020 an moun kontinye ap mouri pa bann ak pa pakèt andedan peyi a. Nan sans sa, Nou Pap dòmi envite tout moun pou kontinye eksprime endiyasyon yo devan konpòtman manfouben dirijan defakto ki la yo ki pa sansib menm devan kadav ti bebe.
Jeff Jean Joseph
