Louberson Benjamin alyas Ti Youri jwenn arestasyon l lendi 28 novanm 2022 a sou wout Dèlma a. Ti Youri gen akizasyon sou do l kòmkwa li se avoka k ap defann chèf gang baz pilat la. Li te akonpanye ak yon lòt sispèk sou yon moto ki pat legal. N ap raple nan jou pase yo, Bawo Mibalè te sòti yon nòt pou denonse endividi sa a ki te vle fè tèt li pase pou avoka ki afilye ak Bawo sa a. Yo te mande Lapolis pou arete l kèlkeswa kote yo jwenn li.
Ti Youri te toujou fè tèt li pase pou aktivis politik yon bò e yon lòt bò te menm bezwen dirije gwo pòs nan peyi a. Arestasyon li an antre nan kad demach fòs lòd yo te toujou ap fè pou mete l yon kote pou machin pa frape akoz li te gen anpil dosye sou do l.
