Eléus Vilanor alyas “Zion” ki se 2e chèf gang Kanaran an tonbe nan echanj kout zam ak lapolis. Polisye yo rekipere nan moman operasyon sa a yon fizi 12. Zion se youn nan pi gwo kriminèl lapolis tap chache e ki enplike nan divès krim tankou asasina, nan mwa mas 2022 a, polisye Henry Mark Millans ki te afekte nan BLVV/DCPJ ak yon ajan BSAP yo te rele Toussaint Roger nan Jerizalèm 8.
Towo sa te fèt 2 desanm 1989. Li patisipe nan divès zak kriminèl k ap fèt sou wout nasyonal nimewo 3 a nan nivo Koray-Seslès. Se nan zòn sa li te konn fè kidnaping, detounen kamyon machandiz, fè atak sou bis k ap fè trajè Mibalè epi brake moun ak zam. Endividi sa a te la nan atak ki te fèt sou radyo Zenith la. Depi 2 fevriye 2022 pakè Kwadèboukè te lanse yon manda rale mennen vini dèyè l pou asasina.
