Bandi ki gen gwo zam nan men yo anvayi plizyè zòn nan Komin Kafou, tankou Mawotyè 79, 85, 87, riyèl chapantye, Bwadjout ak Teso. Daprè enfòmasyon ki rive jwenn Haïti News, depi ayè jedi nan aswè, plizyè nèg ak zam deside anvayi zòn sa yo, tire bal, epi kreye panik lakay sitwayen pezib k’ap viv nan zòn sa yo.
Daprè sitwayen yo, mesye yo se yon gwoup gang y’ap tabli nan zòn sa yo, yo deside kòmanse fè santi yo. Sitwayen nan zòn nan mande lapolis fè yon entèvansyon prese prese yon fason pou pèmèt tout moun okipe aktivite yo san laperèz.
N’ap raple kafou se youn nan komin nan peyi a, malgre ensekirite a ap vale tèren, ki te toujou pezib. Men dènye jou sa yo, gen plizyè aksyon dwòl ki poze, tankou 2 jenn gason moun yo pa rive idantifye te touye, devan lekòl Elie Blaise la.
Jeff Jean Joseph
