Nèg ak zam ki t ap tante kidnape yon moun ant Dèlma 29 ak 19 jodi samdi 2 septanm nan jwenn ak zo grann yo. Gen anviwon 3 malveyan ki fè vwèl pou peyi san chapo aprè Lapolis fin tire yo e popilasyon an mete dife sou yo rapidman. Nan kad entèvansyon sa a, Lapolis sezi tou plizyè zam ak tout chajè, minisyon, epi yon Pikòp koulè gri ki konn abitye kidnape moun sou Dèlma a.
N ap raple nan yon nòt k ap sikile sou rezo yo, Direksyon Jeneral Polis la mete tout kò a an eta d alèt. Pa gen pèmisyon k ap bay jiska nouvo zòd, sèlman si polisye a ta malad. Anpil moun bat bravo pou kout filè ki fèt sou Dèlma a.
