Peyi Etazini pran sanksyon kont Fednel Monchery, Joseph Pierre Richard Duplan ak Jimmy Cherizier.
2 ansyen fonksyonè administrasyon Martelly a, ak ansyen polisye Jimmy Chérizier ki se chèf gang jounen jodi a, jwenn sanksyon sa pou enplikasyon yo nan masak Lasalinn.
Sanksyon sa yo vini, jounen jedi 10 desanm 2020 an, ki make jounen entènasyonal dwa moun. Administrasyon federal amerikèn ak depatman trezò ameriken nan yon nòt pou laprès rann piblik, sible 3 moun sa yo pou vyolasyon grav dwa moun nan peyi Dayiti. Avèk desizyon sa, gouvènman ameriken an kapab vide kont mesye sa yo a zewo daprè “Magnitsky Act”, yon lwa ki te vote nan lane 2012.
Otorite amerikèn yo, fè konnen Jimmy Cherizier, pandan l te polisye, planifye epi patisipe nan plizyè atak nan lane 2018 pou rive 2020 nan katye popilè nan Pòtoprens. Fednel Monchéry ki te direktè ministè enteryè te patisipe nan planifikasyon masak epi te bay zam pou tout bagay te byen pase. Joseph Pierre Richard Dupland kote pal, ki te Delege Depatmantal Lwès, se otè entèlektyèl krim sa, paske l te diskite ak gang ki te fè masak sa, se rezon ki koz li jwenn sanksyon pal tou.
N ap raple toujou daprè rapò sa, nan masak ki fèt Lasalinn nan lane 2018, genyen pi piti 71 moun ki pèdi lavi yo, 400 kay boule, epi bandi yo vyole 7 fanm. Bandi yo te pran viktim yo, trennen yo nan lari, boule kò yo, genyen se bèt ki te manje yo.
Desizyon sa pwouve a klè koman lajistis ayisyèn ap dòmi. Eske aprè desizyon otorite amerikèn yo, lajistis ayisyèn pral ba dèyè yo 2 tap pou pèmèt viktim masak Lasalin yo jwenn jistis?
Jeff Jean Joseph
