Fransèz Emmanuelle Charpentier ak amerikèn Jennifer Doudna resevwa pri Nobel chimi an pou lane 2020 an. 2 jenetisyèn yo sòti loreya mèkredi 7 Oktòb la pou travay yo t ap mennen sou devlopman yon metòd pou modifye jèn yo.
Yo jwenn rekonpans sila aprè yo te mete sou pye ”Ciseaux Crispr, yon zouti pou re-ekri kòd lavi”, daprè jiri a ki chita kò l nan Stokòlm, an Syèd.
Sizo molekilè sila pèmèt yo koupe yon jèn byen, li fasil pou itilize, li pa koute anpil kòb, epi li pèmèt syantifik yo ale koupe yon ADN ekzakteman kote yo vle a. Sa ap ede yo kreye oubyen korije yon mitasyon jenetik epi swayen maladi ki ra yo.
Pri Nobel medsin ane pase a, William Kaelin, fè konnen 2 chèchez yo kapab pote pri Nobel medsin lan ane a tou.
2 fanm sa yo deja te resevwa plizyè lòt distenksyon nan tan pase yo tankou: Breakthrough prize (2015), pri syantifik Princesse des Asturies (2015) ak pri Kavli pou nanosyans yo nan peyi Nòvèj (2018).
N ap raple, Emmanuelle Charpentier (51 lane) ak Jennifer Doudna (56 lane) se 6è ak 7è fanm ki ranpòte pri Nobel chimi an depi lane 1901.
Avan yo, 5 fanm te ranpòte l sèlman sou 183 gason:
Marie Curie (1911) ak pitit fi l Joliot-Curie (1935), Dorothy Crowfoot Hodgkin (1964), Ada Yonath (2009) epi Frances Arnold (2018).
Pooshy Rosana
