Nan kòmansman semèn lan, bawo Lòd Avoka Pòtoprens yo anonse y’ap foule beton an lendi 5 Oktòb k’ap vini la pou mande jistis pou Mèt Monferrier Dorval, yo te asasinen nan lanwit vandredi 28 dawout la, lakay li nan Peleren 5.
Nan yon konferans pou laprès, Batonyè a.i Marie Suzy Legros fè konnen batay la pap kanpe toutan otè entèlektyèl zak asasina ansyen Batonye a pa pini. Pou yon dezyèm fwa avoka yo nan Pòtoprens ap pran lari, sòti devan Kou kasasyon pou al bout devan lokal kabinè defen an.
N’ap raple, aprè lanmò Mèt Dorval, Konsèy Bawo Pòtoprens lan, nan yon korespondans, te mande prezidan Repiblik la, Jovenel Moïse akòde yo otorizasyon pou yon komisyon entènasyonal mennen yon ankèt endepandan sou lanmò Mèt la. Daprè inisyatè mobilizasyon an, lèt sila pa janmen genyen yon swivi nesesè.
Pooshy ROSANA
