Yon fanm ayisyèn blese plizyè fwa ak kout kouto aprè yon diskisyon ak mari li, byen bonè lendi maten sou ri Santiago Rodríguez, nan vil fwontyè Dajabón, nan Repiblik Dominikèn. Daprè jounal dominiken CDN, gason an, ki idantifye pwovizwaman sou non Valentín, ta antre nan yon diskisyon ak madanm li aprè li te mande l pou l ba li soup li t ap manje a. Fanm nan te refize, sa ki ta lakòz diskisyon an vin pi grav. Pandan altèkasyon an, mari an ta atake madanm li plizyè fwa ak yon kouto, li blese l nan tèt ansanm ak lòt pati nan kò li.
Aprè agresyon an, viktim nan te rete kouche sou twotwa a pandan plizyè minit, anvan yon konpatriyòt ak kèk moun nan katye a te vin pote l sekou. Yo te transpòte l prese nan lopital piblik minisipal Dajabón pou resevwa swen.
