Jocelyn Compère, se non yon granmoun gason ki vyole yon fiyèt ki genyen sèlman 11 lane. Zak sa a, daprè enfòmasyon ajans Haïti News konfime, rive nan komin Tomasik (depatman Sant) peyi a.
Otorite polisyè yo, nan depatman an, pa t pran tan pou te mete men nan kolèt prezime vyolè a, ayè jedi 22 oktòb la. Joël Bellefleur, Responsab komisarya Tomasik la, fè konnen otorite polisyè yo nan komin nan te deja resevwa plizyè plent nan kèk abitan kont Jocelyn Compère.
Pou kounye a, Jocelyn Compère sou kontwòl otorite jidisyè yo ki pral defere dosye a devan Pakè nan komin nan.
Depi yon bon bout tan, vyòl sou fiyèt tounen yon pratik k ap vale tèren nan peyi a. Nan dat 6 septanm pase a, plizyè bandi te vyole nan lannuit yon adolesan ki genyen 17 lane nan vil Miragwàn, an prezans papa l.
Wilner Jean
