Dat la toujou kenbe. Dimanch 6 novanm 2022 nan Cultural Miramar ki chita kò l nan 2400 Civic Center Place Miramar, FL 33025, se la fanmi Michael Benjamin kase randevou ak gran piblik la pou yo kapab selebre lavi chantè a, jan sa pibliye nan yon nòt. Pòt yo ap louvri a 1è PM. Sòti 1è pou rive 2è 30, fanmi an ap resevwa salitasyon e sèvis komemorasyon yo ap demare a 3è egzat, toujou daprè nòt fanmi an mete deyò a.
Espas la limite donk fanmi an mande tout moun mache bonè yon fason pou yo kapab akeyi foul la. Yo mande tout moun mache an blan e ap gen ekran LED sou lakou a pou pèmèt asistan yo suiv seremoni k ap dewoule anndan an. N ap raple Mikaben te mouri aprè kè l te fin rete nan jou ki te 15 oktòb la nan vil Pari, pandan l t ap jwe yon konsè ak gwoup CARIMI.
