Depi anba lavil pou jouk rive Petyon Vil, gwo mouvman leve kanpe òganize pou kontinye denonse pwoblèm rate gaz la nan ponp yo avèk lavi chè a k ap wonje yo chak jou pi plis. Anpil kawotchou boule, barikad sou tout fòm, popilasyon an ki an kòlè kontinye detache l ak zafè gaz ki pa genyen nan ponp yo.
Manifestan yo pwofite lanse anpil pawòl piman bouk kont gouvènman ki la a yo di ki p ap regle anyen nan peyi a. Yon manifestasyon Lapolis kraze britalman sou wout delma a ak kout gaz lakrimojèn kote yon jounalis sòti blese nan zòn anbasad Kanada. Rete koulye a pou konnen kilè pouvwa an plas la ap pran dispozisyon pou rezoud pwoblèm sa a ki deja sou plizyè mwa, pandan tout moun ap prepare pou relouvèti klas yo.
