Pou yon lòt fwa ankò, premye minis ki la pou yon ti bout tan an pa bay okenn valè ak revandiskasyon mas popilè a. Nan diskou li fè 5 oktòb 2022 a, li sèlman mande pèp la pou l kale je l yon bò epi mande entènasyonal la vin ba l yon kout men pou rezoud kriz la yon lòt bò. Pil ak pakèt pwoblèm k ap wonje sosyete a pa di l anyen.
Tout peyi a bloke sòti nan Nò pou rive nan Sid. Lekòl ki rete kòm sèl kado yon paran ayisyen kapab ofri pitit li paka louvri akoz lavi chè ak pwoblèm gaz ki pa genyen. Anpil moun ap di yo paka konprann sa k ap pase premye minis Ariel Henry ki pa fè okenn pitye de pwoblèm moun ki pi mal yo. Sèl sa li mande yo se kale je yo, menm jan ansyen prezidan Jovenel te konn di sa.
