Byen bonè maten jedi 10 novanm nan, bandi ki fè pati gang Ti Lapli ap dirije nan Gran Ravin mete tèt ak mesye Ti Makak yo atake Sou-Komisarya Savann Pistach la e mete polisye yo an dewout. Anpil kout zam t ap chante e popilasyon an pa konn ki sen pou yo rele. Nan mitan jounen an, wo grade PNH la te resi voye ranfò e anonse yo reprann kontwòl sitiyasyon an. Pandan tan sa a, anpil moun tonbe nan kache akoz atak ame sila a.
Chèf gang Gran Ravin nan fè plizyè atak sou Lapolis deja. Malgre tout menas sa yo, se polisye yo ki toujou sòti viktim san bliye popilasyon sivil la. Se vre gen ranfò ki ale nan zòn nan men sa pa anpeche pwoblèm nan toujou egziste e bandi yo kontinye ap simen latèrè nan Kafou Fèy.
