Vandredi 29 desanm nan, nana laprè midi, komisè gouvènman Mibalè a nan tèt kole ak Lapolis fè yon bèl kout filè. Aprè fouy ki fèt sou yon Pikòp koulè gri, plak TP-27194 ki t ap transpòte poul ak lòt bagay, yo jwenn yon pil sak katouch. Aprè kontaj se 9960 plon kalib 5.56 yo jwenn ladan yo. Robinson Descolines, Jean Lipré Descolines ak Belgrade Smith anba kòd.
Tout katouch sa yo sòti dirèkteman an Repiblik Dominikèn pou antre nan peyi a. Kouman yo fè travèse fwontyè a? Èske se nan kontrebann yo pase? Ki kote yo ta prale avèk katouch sa yo? Se kesyon ki difisil pou jwenn repons.
