Sibstiti komisè gouvènman Jakmèl la, Mathurin Royal, konfime Lapolis nan vil la mete anba kòd ayè jedi 17 novanm nan, Edison Samedy, pandan yon operasyon. Li fè pati gang Vitelòm nan. Toujou daprè mèt la, gen 7 lòt moun lapolis arete nan kad operasyon sa.
Anpil nan bandi k ap feraye nan zòn metwopolitèn nan se swa yo se moun andeyò oubyen yo toujou al kache an pwovens pou restore tèt yo. Gen plizyè komin nan peyi a kote Lapolis toujou mare bandi ki fè pati gang nan kapital la. Edison Samedy se youn nan alye Vitelòm ki konn ap mete dlo nan je senp sitwayen nan komin Taba ak zòn anviwon yo.
