Daprè RNDDH, anpil polisye ki abò kèk blennde kò polis la akonpanye pwopriyetè biznis, chofè kamyon oubyen senp sitwayen k ap sòti sitou an Repiblik Dominikèn. Menm pratik sa a fèt nan Matisan tou. Pou sa fèt, moun ki entèrese yo peye sòti 250 a 500 dola ameriken e se menm pratik komèsyal sa a ki te lakoz polisye Lincoln Bien-Aimé mouri paske frè zam li yo te pito lòt moun k ap peye monte cha yo.
Polisye ki la pou pwoteje ak sèvi yo tonbe nan vann sèvis sa a ki se sekirite. Pou ede moun travèse baz 400 mawozo nan Kwadèboukè, se gwo sòm lajan anpil patikilye peye pou sa. Se youn nan rezon ki fè RNDDH ekri IGPNH la pou mande l louvri yon ankèt prese prese sou rezo fosè sa a ki gen nan komin Kwadèboukè ak Matisan.
