Lanmò chèf gang Maryani an ap sikile sou tout rezo yo kòmkwa li ta mouri. Yon enfòmasyon ki pa verite daprè sa nou aprann. Bout Ba pa mouri men nan tèt kole ak Lapolis, popilasyon an rive etenn souf 5 malfra nan ekip li a. Nou aprann tou bandi sa yo te nan tire ak cha Lapolis la men yo pa fin konnen zòn Maryani an byen paske se Gran Ravin yo sòti al pote ranfò. Se sa ki fè anpil ladan yo jete zam yo nan lanmè, sa ki pèmèt popilasyon an pran yo ak manchèt.
Bout ba ak alye l yo ap chache pran kontwòl Labatwa Maryani an e yo bezwen mete yon pòs la pou yo ka ranmase lajan nan men chofè machin k ap pase yo. Dènye tan sa yo, chèf gang sa a pale anpil pou tante defye Lapolis.
